Patišon+Koraba = zajubjeni par!

Uvik san mislila da je koraba korjenasto povrće, ka karota i celer (pa bi je tako najčešče i tretirala – itnila u juvu). A evo čitan da san cili život proživila u neznanju (kako se čovik uči dok je živ!). Koraba (koleraba, keleraba) je jena vrsta kupusa!!! Aj priznajte, niste ni vi to znali? List i stabjika se moredu kuvat u slanu vodu za krem-juvu oli varivo (aha, ovo nisan izumislila ja vengo pročitala i taman je po mome geslu „ništa se ne baca“ –a i inače san prija dosta vrimena vidila na televiziji poznate kuvare koji nikakve „otpatke“ od guljenja ne bacadu jerbo tu ima najviše zdravja, oni od tega činidu temejce). U zamrzivaču more stat nekoliko miseci. Od MLADI plodova moredu se radit čak i voćne salate (u krajnjoj liniji zašta ne, ka jabuka...ajme meni nisan imala dosti još i za to, inače bi ja vami isto to prezentala). Meni je cilj, ne otkrivat toplu vodu - ovdi ima puno riceta, vengo poučit DA SE NIŠTA NE BACA, DA SE SVE MORE ISKORISTIT !!!

E kad smo se lipo izinformirali, ajmo na posal!

Prvo dobro, dobro operite šinjorinu Korabu i šesnega mladića Patišona. Ako niste sigur jesul „tretirani“ ostavite i da se banjadu u vodi i sodi bikarboni. (Postoji soda za jist i za prat, jeste to znali? Meni to lipo rastumačija moj momak iz butige zdrave spize. Iako se ovdi radi o pranju, vi uzmite onu za spizu, ča je uzimate kad vas napane žgaravica il ča je mećete u kolače i pogače.)

Onda in zgulite koru (da ne rečen da in skinete skalp) i lisje korabe. Najprin stavite koru od šinjorine, dame uvik imaju prednost, pa poslin njeno lisje i koru o momka.  Dok se oni druže , vi nasickajte njiova tila (oprosti mi bože, ne znan kako drugovačije napisat). Ako imate više ovi momaka i cura, vi jedan dil pospremite u vrićice za zamrzavanje. (Ja san imala dvi cure, pa jednu odvojila za drugi put, neka se nađe.) Onda izvadite vanka koru o šinjorine Korabe. Dodajte sad ona nesritnja nasickana tila u tu istu vodu i pustite i nakratko nek se kokolavaju. (Morete vi dodat i koji kumpirić, mrkvicu, pomicu – ka ča inače činite  juve, ma kako je ovima bija prvi put da su skupa, ja san i ostavila da budu nasamo.) Nakon kratka vrimena, izvadite većinu ispomišani jubavnika, a njiov ostatak ostavite da uživaju boga svoga dok se ne raspanu od nemoći. Onda i samaštrajte u krem – juvu, dodajte so, papar, pinku uja. Morete kvarit otu njiovu idilu dodajć vrhnje, ja nisan tila.

Dok se u teći odigrava jubavni čin, vi isickajte neko povrće (koje volite, koje imate, ma kako vas trefi inšpiracjun) na ne baš sitne bokuniće. U mene su gostovali: jedna balancana i jedna mala tikvica, dvi malešne karotice i restlovi trikolorni paprik. Kapulu i luk san skroz zaboravila, al posli se pokazalo da nisu nikon falili... (A, iskreno, ide mi naživce ta kapula, svudi se tura, ne moš počet ricetu brez da piše - na uje stavite šufigat nasickanu kapulu...ka ono u bajke da moradu najprin počet sa – jednon davno, davno, živila je...)

Sad sve nji zajedno posolite i popaprite, dodajte ostale začine kako van drago (opet ja i Šekspir!), potrpajte u škrovadu, prelijte sa ujen i promišajte. Stavite peć na oko 200 stupnjeva (more i manje, ča ja znan kako peće vaša pećnica). Usrid pečenja poškrapala san samo pinku vina, ka pop kad krsti dicu. Proćirite i kad vidite da su svi lipo uvatili bakrenu boju, onda je to znak da in je dosta kvarcanja i vadite škrovadu vanka.

U međučinu vi morete spravit koji dodatak – meso za mesoždere il npr. rizi il pire il manistru – za vege(tarijance). Moja prva ideja je bila bulgur za mene i rizi za njega, ka ča morete vidit na sliku. (To da san sigurna da će ovi moj izist, jerbo mi nešto njorga na bulgur.) Al stara je izreka – čovik snuje, a bog određuje. Pomočila ja to dvoje separirano, istu količinu u iste veličine čikare. I nakon malo vrimena ča iman vidit – oni bulgur naresta skoro priko ruba, oće da se prekobaci vanka. Ja brzo njega prikomandan u jednu veću posudu. Nakon opet nešto vrimena luknen ja njega, a on se razgavania ka beg imotski...o post ti ćaćin, ča ću su tolkin bulguron?! Mislin se, mislin, ka profešur Baltazar, i – ekola! Ideja je rođena. Napraviću voćnu salatu ala koljivo. (Nemojte me pogrišno sfatit vi koji ne znate ča je „koljivo“. To ni neka gruba stvar ka ča jon je ime, vengo puno lip desert od kuvane šenice. Samo san jednon jila na jednemu sprovodu u Herceg Noven i puno mi se svidilo. Prokulkajte malo ako vas zanima kako se čini pravo koljivo). Bulgur je i tako šenica. Ova moja je već nabubrila i spremna za jist. (Ovo mi je moja kul-prija otkrila da se ne mora kuvat, ja dosad jesan i stvarno se onda malo skaši, ka rižot, ovako je lipo rastresito, svako zrno za se.) Sad van neću otkrivat kako san činila, biće posebna riceta.

I ča je na kraju bilo s rizima?

Ovi moj doša izvanka, da je srija kuma i da je kuma bila bolesna cilu šetemanu od stomačne viroze, imala fibru, rigala i tako to. - E bidna moja Tajo, žalin je ja. Onda on reče da sigur ima i on tu stomačnu virozu, pa neka ja njemu dan samo raskuvane rizi. (Jučera je isto kuka da ga boli, pa je reka da mora da je to od ćevapa. -Ma je, a kako meni nije ništa, i ja san jila isto ka ti...Onda san sinoć pravila palačinke od heljde, izija tri komada i reka da su odlične. Jutros, prija nega je iša vanka, reka je da ga sigur boli štumik od palačinka. – Ma čoviče, pa i ja san jila palačinke isto ka i ti, a meni ni đavla...Ne znan ča će sutra bit novega!)

Uglavnon, skuvala san rizi su mrvu uja, malo sebi odvadila za prilog, ostalo njemu dokuvala. Ostalo mi pola povrća nepojedeno, juvu niko taka...en ti i kuvanje kad san išta kuvala! Duševne boli san popodne izličila, uz kafu, su onon koljačkon salaton.